1.O ñarro-ñarro       

Tema do repertorio de Francisco de Viduido, gaiteiro da Serra da Capelada recollido polo grupo Devadoira, de quen nós o aprendimos

2. Alalá de Menduiña e muiñeira do Morrazo     

O alalá é a nosa particular recreación da 1ª parte da muiñeira que o sucede, a nº.307 do C.M.G. de Castro Sampedro, recollida na península do Morrazo.

Cantan os galos
Ergue meu amor e vaite
Como m'hei d'ir-e
Como m'hei d'ir e deixarte

Cantan e cantan
i-alá pola madrugada
Como m'hei d'ire
Como m'hei d'ir miña amada

3. Xotas de Poio e Acevedo        

A 1ª formaba parte do repertorio de Manuel Villanueva, gaiteiro de Poio, recollida no C.M.G. de Castro Sampedro co nº 354. A de Acevedo era tocada por Paulino, gaiteiro de A Fonsagrada. 

4. Pasacorredoiras Mariñán II    

Versión extendida desta fermosa composición, obra de Adolfo Anta Seoane.

5. Muiñeira de Piadela      

Muiñeira interpretada polo Gaiteiro Rilo de Betanzos no concurso de gaitas de Compostela do ano 1893. Nel acadou o 1º Premio dotado con 100 Pts.

6. Albobarreira      

Tema composto polo "Alalá de Ourense" (col. particular de Xavier Garrote), pola "Alborada da Barreira" (tradicional), e polo Pasacorredoiras da col. de Perfecto Feijoo (CF 22) publicada por J.L. Calle, baseado na versión de Susana Seivane.

7. Percorrido turniscante    
Pasacorredoiras de Santiago / Muiñeira de Xinzo.

Baixo este título agrupamos o "Pasacorredoiras de Santiago" que fai o nº450 do CMG. de Casto Sampedro sucedido pola "Muiñeira de Xinzo" do repertorio de Xesús Portela.

8. Esvarante    
Anxo Pintos

Os dedos escoan polos bordóns dunha zanfona oceánica da que xurden sereas de exhalantes pulmóns infinitos.

9. Sete xastres      

Chisco recolleu directamente dos informantes estas dúas muiñeiras. A primeira en Imende, no concello de Carballo. A segunda en Pigarzos, no limite entre os concellos de A Lama e Avión.

Teño un amor peneireiro
nas cordas do corazón-e
sete xastres fan un home
sete peneiros non-e

Teño lanchas, teño remos
teño sardiñas no mar-e
teño unha nena bonita
non quero máis traballar-e

Canto aquí canto na Habana
canto aquí canto na Habana
e como canto tan ben
canto donde me da a gana

Tódolos que cantan ben
cantan unha vez o ano
eu como canto tan mal
paso a vida cantando

Viva viva quen me axuda
máis quen m'ha d'axudar-e
vivan os da miña terra
a mailos do meu lugar-e

Viva quen canta conmigo
a máis quen comigo canta
viva quen canta comigo
a maila miña garganta.

10. En las montañas de Galicia      

Cesar Longa fixo a primeira adaptación para arpa céltica deste fragmento do Andante da Sinfonía nº2 de Andrés Gaos, dende o disco gravado pola Orquestra Sinfónica de Galicia. A arpista Alba Barreiro Mariño completou a transcripción dende a partitura orquestral proporcionada polo mestre Xoan Trillo. Grazas ós tres.

11. Foliada dos Morenos    

A lúdica enerxía que desprende esta foliada do repertorio de "Os Morenos de Lavadores", levou a Lizgairo a "pasacorredoirizar" a Marcha Procesional de Lousame (Noia) recollida co nº505 no C.G. de Martínez Torner e Bal y Gay, que tocan precedendo a antedita peza.